तुलसीपुर उपमहानगरपालिका वडा नम्वर १३ मा लगाएको ताला आज सोमबारको मितिले २४ घण्टा भित्र नखोलिए उपमहानगरपालिकामा तालाबन्दी गरीदिने १० जना वडा अध्यक्षहरुले चेतावनी दिएका छन् । आज सोमबार बिहान तुलसीपुरमा भेला भएका १० वटै वडा अध्यक्षहरुले वडा नम्वर १३ कार्यालयमा लगाएको ताला बार्ताको माध्यमबाट समाधान गर्न आह्वान गरेका छन् । नगरप्रमुखसँग बार्ता र सम्वाद गर्न वडा नम्वर ७ का अध्यक्ष टोपबहादुर केसीको संयोजकत्वमा वडा नम्वर ९ का अध्यक्ष घनश्याम ढकाल र वडा नम्वर १० का अध्यक्ष कुमार लामिछाने सदस्य रहेको ३ सदस्यीय वार्ता समिति गठन गरीएको वडा नम्वर १३ का अध्यक्ष डम्वरबहादुर न्यौपानेले जानकारी दिनुभयो ।
हिजो आईतबार नेकपाका स्थानिय नेताहरुका नेतृत्वमा लगाएको तालाका कारण सेवा प्रभाबित भएको छ । कर्मचारीहरु बाहिरै बस्न बाध्य भएका छन्  भने सेवाग्राहीहरु परिसरमा अन्यौलमा रहेका छन् । सडक निर्माणका लागि उपभोक्ता समिति गठनमा नेकपाको भागभण्डा हुनुपर्ने माग गर्दै हिजो आईतबार तालाबन्दी गरेका थिए । गत असारमा गठन भएको उपभोक्ता समितिले तुलसीपुर उपमहानगरपालिकासँग योजना सम्झौताका लागि प्रक्रिया अगाडी बढाउदा आलटाल गरेको र नेकपाले यसको फाईदा लिदै तालबन्दी गरेको हो । 
गत स्थानिय तहको निर्वाचनमा तुलसीपुर उपमहानगरपालिका वडा नम्वर १३ मा नेपाली काग्रेसबाट उम्मेदावरी दिएका वडा अध्यक्ष र ४ जना वडा सदस्यहरु निर्वाचीत भएका थिए ।