समाचार

    मेसी अर्जेन्टिनालाई जिताउन ट्रेनिङ सत्रमा सक्रिय

    ब्युनोज आयर्स, चैत ९ (एजेन्सी)

    फुटबलको व्यस्त खेल तालिकाबाट केही समयका लागि विश्राम लिँदै बार्सिलोनाका सुपर स्टार लिओनल मेसी अर्जेन्टिनाको अभ्यास सत्रमा उपस्थित भएका छन्।

    विश्व कप छनोटअन्तर्गत विहिबार अर्जेन्टिनाले पछिल्लो समय आफ्नो लागि घातक बन्दै गइरहेको चिलीसँग खेल्दैछ। चिलीसँग पराजय भोगेको खण्डमा अर्जेन्टिनाको आगामी विश्व कप छनोटको यात्रा निकै कठिन हुनेछ। 

    त्यसैले गत सोमबारदेखि ब्युनोज आयर्समा सुरु भएको अभ्यास सत्रमा मेसी निकै सक्रिय देखिएका छन्। अर्जेन्टिनी टिमको कप्तान पनि रहेका मेसीलाई राष्ट्रको लागि क्लबजस्तै राम्रो खेल प्रदर्शन नगरेको आरोप लाग्ने गरेको छ। 

    मंगलबार अभ्यासमा उनी च्याम्पियन्स लिगका आफ्ना दुई प्रतिद्वन्दी क्लब म्यानचेस्टर सिटी र पेरिस सेन्ट जर्मनीका खेलाडीद्वय सर्जियो अगुइरो र एन्जल डि मारियासँग रमाइलो गर्दै गरेको देखिए। 

    यसपालि अभ्यास सत्रमा यी तीन खेलाडीका साथै एजेक्विल लाभेजी पनि सक्रिय छन्। उनको विषयमा अर्जेन्टिनाको एउटा एफएमले गाँजा खाएर अभ्यासमा संलग्न हुने आरोप लगाएपछि बबाल भएको थियो। जसको विरोधमा अर्जेन्टिनी टोलीले पत्रकार सम्मेलन बहिस्कार गरेका थिए। अर्जेन्टिनाको अभ्यासमा जाभियर मास्चेरानो र गोन्जालो हिग्विन पनि संलग्न छन्। 

    अर्जेन्टिना हाल दक्षिण अमेरिकी छनोटमा अंक तालिकाको पाँचौ स्थानमा छ। यस क्षेत्रबाट शीर्ष ४ टोली सिधै विश्व कपमा समावेश हुने नियम छ। पाँचौ टिमले भने ओसियाना क्षेत्रको च्याम्पियनसँग प्लेअफ खेल खेल्न पाउनेछ, जसमा विजयी भएको टिम विश्व कपमा समावेश हुन्छ। 

    यस हिसाबले अर्जेन्टिनाको प्लेअफ खेल्न पाउने अधिकार हालसम्म सुनिश्चित छ। चिलीसँगको पराजयले अंक तालिकामा अझै तल झर्दै अर्जेन्टिनाले यो अधिकार पनि गुमाउने छ।

Comment

© २०१६ रेडियो तुलसीपुर द्वारा प्रकाशित/सर्वाधिकार सुरक्षित Powered By: i-Tech Nepal